Ilisimatusartut nunanit tamalaaneersut katersuupput: 2023-mi Kalaallit Nunaanni ilisimatusarnerit nalunaarsorneqarfiat takuuk

Photo 2 - Map of Arctic Hub Connect - Most regions of Greenland were represented when the researchers at Arctic Hub Connect were sharing their research projects.

Ilisimatusartut 51-it workshoppertitsinermi katersuuteqqammerput. Kalaallit Nunaanni ilisimatusarfigineqartut malinnaaffigilluarneqarniassammata ilisimatusartut suliaqarfinnit assigiinngitsuneersut aatsaat taama amerlatigalutik katersuupput.

 

Allattoq Ole Ellekrog

 

Kalaallit Nunaat ilisimatusartunit nunanit tamalaaneersunit ornigarneqarluarpoq. Nunatsinni pinngortitarsuaq kulturilu immikkorluinnaq ittoq pillugu ilisimatusariartortartut amerligaluttuinnarput. Orniguttartulli ukiut tamaasa amerliartortillugit ilisimatusartorpassuit suut pillugit ilisimatusarnersut malinnaavigiuminaallisinnaavoq – aamma ilisimatusartunit.

 

Taamaattumik Naalakkersuisut Kalaallit Nunaanni ilisimatusarnerit malinnaavigiuminarnerulernissaat kissaatigaat, ilisimatusarfigineqartunillu nalunaarsuinissaq ilaatigut Arctic Hubip allattoqarfiata pingaarnertut suliassaraa. Qanittukkut tamatumunnga tunngatillugu suliaqangaatsiartoqarpoq.

 

Apriilip 17-ianni internetikkut workshoppertitsineq Arctic Hub Connect ingerlanneqarpoq. Tassani ilisimatusartut 51-it assigiinngilluinnartunik ilisimatusarfillit nunanillu assigiinngitsorpassuarneersut katersuupput. Ilisimatusartut nunatsinneersut nunanillu tamalaaneersut aatsaat taama amerlatigisut workshoppertitsinermi taama ittumi peqataapput.

 

Ilisimatusartut misilittakkatik pillugit avitseqatigiipput ornigullutillu misissuiartornissaminnik eqqartuillutik. Workshoppernerullu nalaani ilisimatusartut tamarmik siunissami suliniutissaminnik nunap assinganut nalunaaqutsiipput. Nunap assinga uani takuuk.

 

 

“Arctic Hub Connectimilli aaqqissuussisoqarneratigut nunatsinni ilisimatusarnerit soqutiginaqisut malinnaavigilluarnerusalernissaannut qanilleriarujussuarpugut. ” Jula Maegaard-Hoffmann.

 

 

Malinnaaviginnilluarsinnaanissaq piumaneqarluartoq

 

Arctic Hub ilisimatusartunik Kalaallit Nunaanni ornigullutik misissuiartortussanik workshoppimut ataqatigiissaariffiusumut siornatigut katersortitsisareerpoq. Maannamulli inuiaqatigiilerinermi humanioramillu ilisimatusartuinnarnik katersortitsisarsimavoq. Ukioq manna workshoppertitsinermi pinngortitamik peqqissutsimillu ilisimatusartuttaaq qaaqqusaapput.

 

”Nuannaarutigeqaarput Arctic Hub Connect soqutigineqarluarmat,” Arctic Hubimi suliniutinik aqutsisoq Jula Maegaard-Hoffmann oqarpoq. ”Tamanna Kalaallit Nunaanni ilisimatusarnerit malinnaavigiumaneqarluarnerannit erserpoq. Naalakkersuisut maanilu Arctic Hubermiut malinnaalluarumasutuaanngillat, aammali ilisimatusartut malinnaalluarusupput”

Photo 1 - Arctic Hub Connect - There was not space for every one of the 51 researchers on screen, when Arctic Hub Connect took place on April 17th.

Arctic Hub Connect apriilip 17-ianni ingerlanneqarmat ilisimatusartut 51-it ilaannaat skærmimi takuneqarsinnaapput.

Ilisimatuut suliaqarfinnit assigiinngitsuneersuugaluarlutik oqaloqatigiissutissaqarluarput, ilaat immamik, antropologiimik, nunarsuup sannaanik kulturikkullu kingornussanik ilisimatusartuummata. Ilaatigut oqaloqatigiissutigineqarputt ilisimatusarfigisanik saqqummiussineq ilisimatusarnermilu paasissutissanik angusanillu innuttaasunut qanoq paasiuminarsaasoqarsinnaanera.

 

Oqaloqatigiissutigineqarluartoq alla tassaavoq ”research fatigue”-imik taaneqartartoq. Research fatigue atugaalertarpoq ilisimatusartut amerlavallaat inuit apersortagaat aalajangersimasuinnaagaangata taamaalillutillu innuttaasut taakku artukkerneqarpallaartarlutik. Workshoppertitsinermi tamatumani ilisimatusartut malinnaavigilluarsinnaanerulerpaat ilisimatusarnerit ilisimatusarfigisaminnut assingusut suut qanittumi ingerlanneqassanersut. Ilisimalikkatik taakku iluaqutigalugit attaveqatigiissinnaapput ataqatigiissaarilluarsinnaanerulerlutillu innuttaasunik artukkiinnginneruniassagamik.

 

 

Ilisimatusarnermut periusissiamut ilaasoq

Kalaallit Nunaanni ilisimatusarnerup malinnaavigilluarneqarnerunissaanik kissaat Naalakkersuisut ilisimatusarnermut periusissiaannut nutaamut ilaavoq pingaarutilik. Ilisimatusarnermut periusissiaq ukioq manna januaarimi tamanut saqqummiunneqarpoq 2030-lu tikillugu atuutissalluni. Tamatumani anguniagarineqartut pingaarnerpaartaat tassaavoq Kalaallit Nunaanni ilisimatusarnerit tamarmik Kalaallit Nunaannut iluaqutaanissaat. Anguniagaq tamanna angujumallugu pingaarnerpaamik ilisimaneqartariaqarpoq ilisimatusarnerit suut nunatsinni ingerlanneqarnersut.

 

Nunatsinnili ilisimatusartut arlaannut nalunaarsorneqartarnissaat pillugu maannamut piumasaqaateqanngilaq. Taamaattumik nunatsinni ilisimatusarnerit suli tamakkiisumik malinnaavigineqarsinnaanngillat.

 

”Soorunami Kalaallit Nunaanni ilisimatusartut ilaannaat – piumasut workshoppertitsinerlu pillugu tusagaqarsimasut kisimik – peqataapput. Arctic Hub Connectimilli aaqqissuussisoqarneratigut nunatsinni ilisimatusarnerit soqutiginaqisut malinnaavigilluarnerusalernissaannut qanilleriarujussuarpugut. Neriuppugut tullissaanik peqataasut suli amerlanerussasut,” Jula Maegaard-Hoffmann oqarpoq.

 

Arctic Hub Connect tullissaanik 2024-mi ingerlanneqassaaq.