Ilisimatusartut ilisimasaminnik innuttaasunut saqqummiussillaqqinneqqisaannerat

Paasisavut - research competition Greenland, Arctic Hub

Kalaallit Nunaanni ilisimatusarfigisat tamanut ammaanneqaatigisaannik unammisitsisoqartalerniarpoq. Unammisitsinermi tamatumani ilisimatusartut ilisimatusarfigisatik pillugit tamanut paasiuminartumik nassuiaallaqqinneqqisaatissapput.

 

Allaatiginnittoq Nicoline Larsen

 

Ilisimatusartoq Katuami kisimiilluni sassarpoq. Taassuma saavaniipput naliliisartut, tusarnaariarpassuit filmiuullu KNR-ikkut toqqaannartumik aallakaatitsisoq.

 

Suliassaq ajornanngippasikkaluarluni imaannaanngilaq, manna suliassaammat: Ilisimatusarfigisat minutsini tallimani nassuiarneqassapput, ilisimatusarfigisavit sumut tunnganeranik aamma sooq pingaaruteqarneranik kikkunnut tamanut paasiuminarsaassallutit.

 

Ilisimatusartoq suliassamik naammassinnilluarnerpaaq 25.000 kroninik Brugsenimit aningaasaliissutigineqartunik eqquissaaq, ilisimatusartutullu ilisimatusarfigisaminik saqqummiussillaqqinnerpaanini ataqqinaatigilissavaa. Ilisimatusarfigisanik saqqummiussillaqqinneqqisaannermi aallarnerneqartussami Arctic Hubip Ilisimatusarfiullu aaqqissuussaanni tamanna pingaarnersaassaaq.

 

Unammisitsinersuaq Paasisavut-mik taaguuserlugu toqqaannartumik naggataatigut aallakaatitsinneqassaaq.

 

Paasisavut siullermeerluni ingerlanneqalerpoq

”Kalaallit Nunaanni massakkut ilisimatusarfigineqartut soqutiginarluinnarlutillu ullutsinnut attuumassuteqartuupput. Ajoraluartumik ilisimatusarfigineqartut ilarpassui innuttaasunut anngutinngisaannarput. Neriuppugut Paasisavut aqqutigalugu tamanna allannguivigisinnaassallutigu,” Anna-Sofie Skjervedal, Arctic Hubip allattoqarfiup pisortaa aamma Gitte Adler Reimer, Ilisimatusarfimmi rektori peqatigiillutik oqaaseqaatiminni taama oqarput.

 

Ukiuni marlunni kingullerni ph.d.-nngorniutiminnik suliaqarsimasut naammassinnissimasulluunniit tamarmik unammisitsinermi peqataanissamut qinnuteqarsinnaapput. Tamatuma kingorna taakkua pitsaanersaat tallimat unammeqataasussatut toqqagaassapput.

 

Katuami 2023-mi marsip 1-ianni unammisitsisoqassaaq, peqataasussalli toqqagaasut sassannginnerminni ilisimatusarfigisanik saqqummiussinermi sungiusartinneqassapput. Saqqummiussassaminnik pitsanngorsaanissamut ikiorneqassapput isiginnaartitsisartumillu inuppassuit saavaniinnermi sungiusartinneqassallutik, taakkua saavanni eqqissisimallutik saqqummiussisinnaaniassagamik.

 

Saqqummiussereerpata ilisimatuunngorniartoq sorleq Paasisavut 2023-mi ajugaassanersoq naliliisartut naliliivigissavaat. Isiginnaartoqarluni saqqummiussillaqqinneqqisaattoqassaaq KNR-ikkullu toqqaannartumik tamanna aallakaatinneqassalluni.

 

”Ilisimatusarluni misissuinerit pikkunaatsutut paasiuminaatsutullu isummerfigereerneqarsinnaasarmata qularutiginngilarput Paasisavut aqqutigalugu isiginnittaatsimik tamatuminnga naqqiisinnaassalluta. Isumaqarpugut Paasisavut aqqutigalugu uppernarsarneqarsinnaasoq Kalaallit Nunaanni ilisimatusarnerit soqutiginartuusut, inuunitsinnut attuumassuteqartut aliikkutassaalluinnarsinnaasullu,” Anna-Sofie Skjervedal Arctic Hubimeersoq oqarpoq.

 

Unammisitsineq siullermeerluni ingerlanneqarumaarpoq, Arctic Hubimilli Ilisimatusarfimmillu anguniagaavoq Paasisavut ukiut tamaasa ingerlanneqartassasoq.

 

2022-mi novembarip 1-iat qinnuteqarnissamut killigitinneqarpoq. Unammisitsinissaq qanorlu peqataasoqarsinnaanera pillugit paasisaqarnerusinnaavutit uani www.paasisavut.gl.

Info meeting