Ilisimatusarneq pillugu nalliuttorsiualaaqataagit

November 4, 2025 | Written by Arctic Hub

Assiliisoq: Emil Stach/Arctic Hub

Greenland Science Week innuttaasut ilisimatuunik naapitsinissaannut oqaloqateqarnissaannullu immikkorluinnaq ittumik periarfissiivoq.

Ilisimatusartut nunanit tamalaaneersut nunatsinni sulerisarnersut paasisaqarfigerusussinnaagukku taakkua ilaat novembarip 7-anniit 14-iannut Greenland Science Week-imi naapissinnaavatit. Greenland Science Week Arctic Hubimit aaqqissugaasoq ilisimatusartunuinnaanngilaq – tassami nalliuttorsiualaartitsineq illoqarfinni nunaqarfinnilu arlalinni ingerlanneqassaaq, ullunilu arlalinni innuttaasunut aamma ammassaaq.

”Innuttaasut, susassaqartut ilisimatuullu naapisimaarteqattaarnissaat naapisimaarnernilu alapernaannerup qitiutinneqarnissaa qilanaaraarput. Ilisimasanik avitseqatigiinnissamut periarfissaqassaaq ilisimatusarnermilu suliaqarusuttut suliaqalernissamut periarfissat pillugit paasissutissinneqarumaarlutik,” Avijâja Rosing-Olsen, Arctic Hubip allattoqarfiani pisortaq, oqarpoq.

Greenland Science Week pillugu paasissutissat:

Greenland Science Week ilisimatusarneq pillugu Kalaallit Nunaanni aaqqissuussat pingaarnersaraat. Sineriammi sumiiffiit ilaanni sapaatip-akunnerata ilivitsup iluani ingerlanneqassaaq.

Ullunut taakkununnga naggasiutitut Nuummi novembarip 12-ianni 13-iannilu ilisimatusarneq pillugu ataatsimeersuartoqassaaq, novembarillu 14-ianni matut ilisimatusarneq pillugu alapernaatsunut tamanut ammarneqassapput.

Greenland Science Week ukioq allortarlugu ingerlanneqartarpoq, sisamassaanillu ilisimatusarneq pillugu nalliuttorsiualaartitsisoqassaaq. Aaqqissuussaq pillugu paasisaqarnerorusukkuit uani atuarnerusinnaavutit: https://www.scienceweek.gl/

Greenland Science Week pilersinneqarpoq ukua qanimut suleqatigiinneratigut: Arctic Hub aamma AAU Arctic, Ilisimatusarfik, Pinngortitaleriffik, Greenland Climate Research Center, DTU – Danmarks Tekniske Universitet, Asiaq, Qeqqata Kommunia aamma ILLU Science and Art.

Greenland Science Week piviusunngortinneqarpoq Novo Nordisk Fondenip Kommuneqarfiullu Sermersuup tapiissuteqarneratigut.

Ilulissani ilaatigut akisussaassuseqartumik takornariaqarneq pillugu paasisaqarsinnaassaatit dronillu pillugit wokshoppeqataasinnaassallutit, aammali Pinngortitaleriffimmeersut tamaanilu piniartut kangerlummi iluliarpassuanittartumi silap pissusiata allanngoriartornera pillugu oqaluttuartut tusarnaariarsinnaavatit. Novembarip 7-aniit 9-anut, Ilulissat Science Forum isf25

Ulluni taakkunani aamma Sisimiuni kulturikkut illorsuarmut Taseralimmut ornigullutit nunarsuarmi eriagisassat Aasivissuit-Nipisat siunissaat pillugu Sisimiormiut, ilisimatusartut takornariartitsisartullu oqalliseqatigisinnaavatit, Qeqqata Program 2025

Novembarip 9-anni Sarfannguani angalaaqataasinnaavutit, Kangerlussuarmilu novembarip 10-anni 11-annilu sumiiffinnik nunatsinni ilisimatusarfigineqarnerpaanik – tassa sermersuarmi Russell Glacierimik aamma Point 660-imik – alakkaaqataasinnaavutit.

Tamakku tamaasa naggaserlugit aaqqissuussaq ’Qaagitsi’ Nuummi tallimanngornermi novembarip 14-ianni ingerlanneqassaaq, kulturikkut illorsuarmi Katuami oqalugiartoqarlunilu saqqummiisoqarlunilu workshoppertitsisoqassammat. Ilaatigut nunatta kangiata sineriaani silasiorfiit pillugit nunatsinnilu puilasut kissartut ilisimaneqarpallaanngitsut pillugit paasissutissiisoqassaaq, Science Week Nuuk‘

”Innuttaasut ’Qaagitsi’ aqqutigalugu ilisimatusarnerup silarsuaanut qaaqqussavavut nunatsinnilu ilisimatusarfigineqartut pillugit paasisaqarnerunissamut periarfississallugit. Ilisimatusarnermi kikkunnut tamanut ammasussaavoq – inuiaqatigiillu ilisimatusarnerullu ataqatigiilersinnerisigut innuttaasut ilisimatusartullu ilisimasanik avitseqatigiittarnerannik pitsanngorsaasinnaavugut, suliaqaqataasut tamarmik iluaqutissaannik,” Avijâja Rosing-Olsen oqarpoq imalu nangilluni:

”’Qaagitsi’ ilisimatusarneq pillugu nalliuttorsiualaarfiussaaq. Aaqqissuussami soqutigisaqaqatit peqatigalugit suliamut tunngatillugu namminerluunniit soqutigisanut tunngatillugu ilisimasanik avitseqatigiittoqarsinnaassaaq.”

Arctic Hub Ataqatigiilersitsineq Ilisimasat Ilisimatusarneq Ingerlatitseqqiineq Innuttaasut Inuiaqatigiit Kalaallit Nunaat

Greenland Science Week pillugu paasissutissat:

Arctic Hub pisortartaalerpoq

Manumina: Meeraanermi illinerniit ilisimatusartutut misissuiartornermut