“Ilisimatusarneq atorneqaruni aatsaat pingaaruteqalissaaq”
Arktisk Hub-ip siulersuisuisa siulittaasuat naapiguk.
Allaatiginnittoq Phillippa Mangalika Maigaard Filtenborg
Kalaallit Nunaat tamarmi ilisimatusarfissaqqippoq, kisiannili katersuiffissaqaranilu siammarteriffissaqanngilaq. Taamaattumik Kalaallit Nunaanni Danmarkimilu naalakkersuisut aalajangerput hub-imik pilersitsinissamut aningaasaliiniarlutik, inuiaqatigiit ilisimatusarnerullu imminnut atassuteqarnissaat anguniarlugu politikerillu ilisimatuut misissugaannik nutaanerpaanik aallerfigisinnaasaannik peqartikkumallugit.
“Hub-i taamaattoq pingaaruteqarpoq, tassami ilisimatusarneq atorneqaruni iluamik aatsaat pingaaruteqalissaaq. Ilisimasat atorneqarsinnaanngorumallugit pissarsiarineqarsinnaasunngortinneqartariaqarput.”
Taama oqarpoq Ulrik Korsholm, Arktisk Hub-imi siulersuisut siulittaasuat.
Silap pissusiata allanngoriartornerujussuanut Kalaallit Nunaat pisuunngilaq. Kisianni kinguneri tamaasa Kalaallit Nunaata atorpai. Taamaattuminguna nunarsuarmiut tamarmik Kalaallit Nunaat akissutissanik pissarsiffigerusukkaat. Arktisk Hub tassaassaaq tamakkununnga apeqqutinut aqqutissiuussisussaq attaveqaqatigiinnermullu kaammattuinissaminut ammasussaq.
“Issittumi ilisimatusarniaruit taava Arktisk Hub aqqutigalugu inuiaqatigiinnut apuussisinnaavutit. Ilisimatusartut nunaqavissunik attaveqarusuttut ikiorsinnaavavut suliaat Kalaallit Nunaanni inuiaqatigiinni atorneqarsinnaaniassammata. Ilisimatusartut aamma Issittumi ilisimatusarnermi inatsisinik paasinninnissaannut ikiorsinnaavavut. Aammattaaq ilisimatusartut ilisimatusartunut allanut attaveqalersissinnaavavut ilisimatusarnerullu iluani sumiiffimmik suleqatigiiffigisinnaasaannik pilersitsilluta,” siulersuisut siulittaasut Ulrik Korsholm taama oqarpoq.
Arktisk Hub Ilisimatusarfiup Pinngortitaleriffiullu eqqannguanniippoq, taamaalilluni ilisimatusartut Kalaallit Nunaanni assigiinngitsorpassuarnik ilisimatuussutsikkut misissuisut suliaqartullu ungasinngisaanni inissisimalluni: sikup oqaluttuassartaa, inuit inoqqaavisa ineriartornerat, uumassuseqarnerup ataqatigiiffii allanngoriartortut, ilinniartitaanikkut periarfissat, niuernermi periutsit assigiinngitsut, aatsitassat qaqutigoortut, inuiaqatigiinni naligiinnginneq, attaveqaatit atortulersuutillu, peqqinnissaqarneq allarpassuillu.
“Artisk Hub pilersinneqarpoq ilisimasanik asuliinnartitsinnginnissaq anguniarlugu ukiunilu aggersuni iliuuseqartoqarnissaanik kaammattuerusulluta. Tamanna Issittumi Ilisimatusarnermi pingaarutilerujussuartut isigaarput,” siulersuisut siulittaasut Ulrik Korsholm taama oqarpoq.