Ilinniartorpaaluit imungarsuaq takorluugallit – Sisimiuni ingeniørinngorniarneq ima ingerlasarpoq

Pilunnguaq Christensen, 24-nik ukiulik
Aalisarnermi teknologii pillugu Arctic DTU-mi Sisimiuniittumi ilinniartoq

Aalisarnermik ingeniørinngorniarnera immamut tunngavoq. Aallaqqaammut issittumi ingeniørinngornialeraluarpunga, sanaartornerli soqutigisarinngilara. Ilinnialigara uannut tulluarneruvoq. Ataataga aalisartuuvoq, taamaattumik immamut tunngasut iserfigiuminartinneruakka. Ilinniakkami issittoq qitiutinneqarpoq, aamma saarulliit qalerallillu, aalisakkat nunatta imartaaniittut, sammineqartorujussuupput.

Uanga kalaaliuvunga. Inuuvunga. Kalaallisut oqaluppunga. Nunatsinni ilinniagaqarnissara pingaartippara. Kullorsuarmiuuvunga, ilaquttannullu tikeraarnissaq akisoorujussuusarpoq. Maanili Sisimiuni ikinnguteqareerpunga, illortaaralu maanimiuuvoq. Nuanneqaaq. Aasaanerani atuanngiffeqarnitsinni ilaquttatsinnut tikeraarsinnaasarpugut, ilaannikkullu ilaquttatta tikeraarsinnaasarpaannga.

Ilinniakkami sammisassat nuanneqaat. Umiartuataartarpugut immamit immallu naqqanit misissugassanik aallertarluta. Klassitsinnerusaaginnarneq ajorpugut. Royal Greenlandip aalisakkerivianut alakkaalluta raajanik saattuanillu qanoq suliarinnittarnersut takuarput.

Naluara inuunera tamaat aalisarnermik suliaqassanerlunga, soqutigisakka amerlanermik. Titartaasarpunga, qalipaasarpunga nuersaasarlungalu. Nukkassarneq, pinngortitamiinneq nipilersukkallu nuannaraakka.

Ilinniakkami maani ikittunnguunerput nuanneqaaq. Apeqqutissaqaruma ilinniartoqatikka ilinniartitsisulluunniit apereriaannaavakka. Immitsinnut qanippugut.

Sisimiormiuulluni aamma nuanneqaaq. Ulapaarfiunngilaq. Pinngortitarsuarmut qanippugut, aamma mikigaluartumik timigissartarfeqarpoq. Ukiup aappaa avillugu maaniissaagut. Taava ukiumi ataatsimi Danmarkimiissaagut. Aamma tamanna qilanaaraara .

Ramon Eric Roset Andersen, 19-inik ukiulik
Issittumi Sanaartorneq Attaveqaasersuutillu pillugit Arctic DTU-mi Sisimiuniittumi ilinniartoq

Ilinniagaq pillugu tusagaqaqqaarpunga DTU tamanut ammasumik saqqummiussimmat. Uninngaannarfiunngitsumik ilinniagaqarusukkama, ilinniagarlu una tulluaqqissaarpoq. Sisimiuunnera massakkut ukiup affanngorpoq. Ilinniagaq tamarmi ukiuni sisamani ingerlatassaavoq, ilinniakkap ilaa Kalaallit Nunaanni, ilaa Danmarkimi immaqalu nunani allani.

Maaniinninni qaammammi siullermi Misissueqqaarnermik taaguutilimmik fageqarpugut, anilluta nunap ilusaanik misissuiartortarluta. Issoq assaavigisarparput, misissuivigisarlugu GPS-imillu uuttuivigisarlugu. Tassa sammerusutakka – ulloq naallugu allaffimmi issiarusaarnani anilluni suliaqariartortarluni.

Kollegiami Apissermi DTU Arcticimit 1 kilometerisut ungasitsigisumiittumi, najugaqarpunga. Campusiliarneq qiianartarpoq, tamannali eqqarsaatiginngikkaanni sumiiffinni allanisulli atuariartornertut iinnarpoq. Danmarkimi DTU-mi ilinniartunik ikinnguteqarpunga. Taakku klassimi ataatsimi ilinniaqatigiit 100-ngajaasarput, ilinniartitsisuminnullu qanittumik attaveqarneq ajorput. Maanili uagut ilinniartitsisutsinnut qanippugut, ilinniartut ikittuararsuugatta. Uagut qulingiluaavugut, taamaattumillu ilinniartitsisutsinnut immitsinnullu qanittuararsuuvugut.

Tamatta kollegiami najugaqarpugut. Uanga efterskolernikuunngilanga, tusartakkakkali naapertorlugit efterskolernertunngooq iinnarpoq. Ilaannikkut nerisassioqatigiittarpugut filminillu isiginnaaqatigiittarluta. Arfininngormat gyserfilmimik isiginnaarpugut.

Uanga siunissamut takorluugaraara avataarsuanik ukkataqarnissara. Isumaqartoqarpoq issittumi sumiiffiit ilaat Marsimi avatangiisinut assingukannersut. Taamaattumik ilinniagara planetimi allami baseliornissamik sammisaqarnissamut immaqa atorsinnaavara. Soqutiginassagaluaqaaq.

Victoria Gjerløv Marrup, 22-nik ukiulik
Issittumi Sanaartorneq Attaveqaasersuutillu pillugit Arctic DTU-mi Sisimiuniittumi ilinniartoq

Anaanama Gerog Gearløsimut assersuuttuaannarnikuuaanga. Matematikki nuannaraara, infeniøriunerlu matematikkimi isumassarsiornermut matematikkimillu suliaqarnermut tunngavoq. Taamaammat angutaatiga issittumi ingeniørinngorniarusunnerminik eqqartuilermat naggataatigut aperaara ilinniariaqatigigukku ajorissannginneraa.

Danmarkimi Fysikki pillugu ilinniagaqallatsiarpunga, ilinniaqatigiit 200-ulluta. Tassani ilinniaqatinnik ilisarisimasaqanngingajappunga. Maani ilinniaqatigiiusugut immitsinnut qanillutalu ilisarisimalluaratta ikioqatigeeriaannaajuaannarpugut.

Angutaatigalu qimuttunik paarseqataagatta qimusseriaqataasinnaasarpugut. Nuannivippoq. Aamma angutaatima nuannarilluinnagaanik snescootereqarpugut, uangali nangialaartarama sungiunniaqqaartariaqarpara.

Ilinniakkatsinni ilikkakkavut soqutiginartorujussuupput. Pinngortitarsuarmi sulisarpugut suliarisavullu orneriaannaallugit. Sapaatit-akunnerisa ilaanni sumiiffik aalajangersimasoq misissuivigiartorparput Aatsitassanullu Oqartussanut tamaani aqqusinniorusuttunu nalunaarusiortussanngorluta. Suliami tamatumani suleriaatsinik ilinniakkatsinnik tamanik atuivugut, uuttuutinik atortoqarluta misissorlugu qatsissutsit qanoq assigiinngisitaartiginersut, nuna sunik akoqarnersoq nunallu ilua qeriuaannartortaqarnersoq.

Danmark Kalaallillu Nunaat qangarsuaaniilli attaveqatigiissimapput, Danmarkimilu oqaluttuarisaanermik tamatuminnga paasinninnissaq pingaaruteqarpoq. Meeqqat atuarfianni Kalaallit Nunaat ataasiaannarluta samminikuuarput. Maani paasisakka inuuninniitittuassavakka, neriuppungalu ilaquttakka ikinngutikkalu paasinninnissaannut ikiorsinnaassallugit. Kalaallit Nunaannut uteqqinngitsoornavianngilanga. Paasinarsiumaarpoq qanoq.