Iluatsissappat illoqarfinni nunaqarfinnilu najugallit ilisimatuut suleqatigalugit Kalaallit Nunaanni ilisimatuutut misissuinermi ileqqorissaarnermut atatillugu malittarisassiussapput. Siunertaavoq ilisimatuut maani najugalinnit paasisatik pillugit arlaatigut tunniusseqqittarnissaat. Ilisimatuutut misissuinerit Kalaallit Nunaannit iluaqutigineqarniassammata.
Allattoq Uffe Wilken, Polarfronten
Ukiuni kingullerni pissutsit taamaattuarsimapput. Ilisimatuut avataaniit illoqarfeeqqanut tikittarput, tikitaminni najugaqartut piniartullu suliniutertik pillugu apersorlugillu oqaloqatigeriarlugit ilisimalikkaminnik suliaqarniarlutik aallaqqittarput. Allanut tunngatillugu ajunngitsumik isumaqarluni kajumissaarutigineqartartoq leave nothing but your footprint matumani allarluinnarmik isumaqalerpoq: Avataaniit tikittut ilisimatuutut misissuinerminni atugassaminnik pissarsisarput, peqatigisimasaminnulli najugalittullu ilisimasaminnik tunniussisimasunut tunniusseqqinnatik aallartarput. Naligiinngissutaasoq tamanna Kalaallit Nunaanni ilisimatuutut misissuinermi ileqqorissaarnermut atatillugu nutaanik malittarisassiornikkut aaqqiivigineqartussanut ilaavoq.
Ilisimasat uteqqittullusooq
Josephine Nymand Pinngortitaleriffimmi ilisimatuujuvoq Nunatsinnilu Ilisimatusarnermik Siunnersuisoqatigiinni siulittaasuulluni. Ileqqorissaarnermut atatillugu malittarisassiornissamik sulissuteqaqataavoq:
”Ukiorpassuarni kingullerni siunnersuisoqatigiinnit oqallisigineqartarsimavoq Kalaallit Nunaanni ilisimatuutut misissuinermi ileqqorissaarnermut atatillugu malittarisassaqannginnera qanoq isumaqarfigissaneripput. Taamaattumik professori Elizabeth Rink Montana State Universitymeersoq peqatigalugu ilisimatuut Kalaallit Nunaannut ornigullutik misissuiartortut iliuuserisassaat pillugit ileqqorissaarnermut tunngasunik malittarisassiornermik ataatsimoorullugu suliniummut aningaasaliisussarsiorpugut.”
Ileqqorissaarnermut tunngatillugu malittarisassiorneq aatsaat suliniutigineqalinngilaq. Allakkiami 1996-imeersumi allassimavoq Kalaallit Nunaanni ilisimatusarnermi ileqqorissaarnermut atatillugu malittarisassiaqartariaqartoq – taamaakkaluartorli taamanimiilli iliuuseqarfigineqarsimanngilaq. Josephine Nymand ima oqarpoq:
”Ullutsinni pingaartinneqarpoq ilisimatuut angusatik pillugit inunnut akuutissimasaminnut arlaatigut tunniussaqartarnissaat ilisimasaminnillu avitseqateqartarnissaat. Angusatik inuiaqatigiinnut saqqummiutissavaat, tamatumalu ileqquliunneqarnissaa sivisuumik kissaatigisimavarput.”
