Kalaallit Nunaata ilisimatusarnermut periusissiaanik paasinnigit

Anguniagaq tamanna sisamanik immikkoortoqarpoq:   

1. Ilisimatusarfiit inerisarneqartuassapput  

2. Ilisimatusarnermi ingerlatat pillugit paasisimasat pitsaanerulersinneqassapput  

3. Ileqqorissaarnissamut najoqqutassat ilisimatusarnermut sinaakkusiissapput  

4. Qangaaniit sumiiffinnilu ilisimasat atorneqarneri annertusineqassapput.   

Kalaallit Nunaannut ilisimatusariartortartut amerlapput. Naalakkersuisulli ilisimatusarnerit Kalaallit Nunatsinni suli tunngaveqarluarnerusarnissaat qulakkeerusuppaat. Tamannalu pissaaq sumiiffinni ingerlataqartut suleqatiginerunerisigut.   

Qangaaniit sumiiffinnilu ilisimasanik immikkullu ilisimasanik ataqatigiissitsineq nunatsinni ilisimatusarnermut nunallu tamalaat akornanni ilisimatusarnermut iluaqutaassaaq. Ilisimatusarnerli innuttaasunut atassuteqarnerulersinneqassappat sumiiffinni ilisimatusarfiit eqqortunik piginnaasaqartariaqarput nukissaqartariaqarlutillu.

Taamaalillutik Kalaallit Nunaanni ilisimatusarneq sammivilersinnaassavaat nunallu assigiinngitsut akornanni ilisimatusarnikkut suliniutini peqataasinnaassallutik. Aamma ilisimatusarneq nunaqqatigiinnut atassuteqarluassappat ilisimatusartut, inuussutissarsiortut, innuttaasut ingerlataqartullu allat attaveqatigiinnissamut periarfissaqarluartariaqarput.   

Naalakkersuisut anguniagaraat ataqatigiissaarinermut suleqatigiinnermullu sinaakkutinik sunniuteqarluartunik inerisaanissaq.  

Anguniakkat aappaanni ilisimatusarnerup piujuartitsisussamik inuiaqatigiinnik ineriartortitsinissamik tapersuinissaanut tunngavoq. 

Ilisimasat ineriartornermut matuersaataapput pingaaruteqartut, ilisimatusarnermilu suliniutit annertusineri siunissami inuiaqatigiinni avatangiisinullu tunngasunut unammillernartut iliuuseqarfiginissaannut iluaqutigisinnaavavut.

Tamatuma saniatigut inuussutissarsiutinik nutaanik aningaasaqarnikkut siuariartortitsilersinnaasunik ineriartortitsinissamut iluaqutigissavavut.  

Pingaarnertut inuussutissarsiutinik tunngaveqarnermit maani nunatsinni isumalluutit periarfissallu annertuut amerlanerusut iluaqutigilernerinut ineriartortinnissaat pisariaqarpoq.

Taamaattumik ilisimatusarnermut periarfissat pitsaasuunissaat Naalakkersuisut qulakkiissavaat, inuiaqatigiit piujuartitsisussamik ineriartortinnissaannut tapertaasinnaaqqullugit.  

Naalakkersuisut neriuutigaat ilisimatusarnerup inuiaqatigiinnut pingaaruteqarnerata sammineqarneruneratigut ilinniarnissamut ilisimatusarnissamullu periarfissanik soqutiginninnerusoqalissasoq.  

Periusissiami anguniakkat pingajuat tassaavoq ilisimatusarnermi angusat kikkunnit tamanit pissarsiariuminartuussasut. 

Ullumikkut Kalaallit Nunaanni ilisimatusarfigineqartut ilisimatusarnermilu angusat tamakkiisumik paasisimasaqarfigilernissaat ajornakusoorsinnaasarpoq.

Ilisimatusarneq iluaqutaalluarsinnaassappat ilisimatusartut, aalajangiisartut, suliffeqarfissuit, pisortat, ilinniartut innuttaasullu ilisimasanut paasissutissanullu isersinnaatinneqartariaqarput. 

Naalakkersuisut anguniagaraat ilisimatusarnermi paasissutissat pillugit naalakkersuinikkut anguniakkap nunat assigiinngitsut akornanni malitassat tunngaveqarnissaannik qulakkeerinissaq, malitassanilu ilaatigut pineqarput paasissutissat pissarsiarineqarsinnaaneri pillugit FAIR-imit tunngaviit. 

Periusissiami anguniakkat kingulliat tassaavoq ilisimatusarnermi suliniutit nunat assigiinngitsut akornannitut qaffasissuseqassasut. 

Kalaallit Nunaanni nunat assigiinngitsut akornannisulli qaffasissuseqartumik ilisimatusartoqalereerpoq.

Tamanna attakkumallugu sulilu ilisimatusarnerusoqalernissaa qulakkeerumallugu sulissuteqartoqartuarlunilu tapersiisoqartariaqarpoq.   

Naalakkersuisut pisortanik namminersortunillu kajumissaaripput ilisimatusarnermut aningaasaleeqqullugit.

Naalakkersuisuttaaq nunatta ilisimatusarfissatut nunallu assigiinngitsut akornanni ilisimatusarnermi aningaasaliiffigissatut suli pilerinarnerulernissaa sulissutigissavaat.   

Naatsumik oqaatigalugu, ilisimatusarneq Kalaallit Nunaannut iluaqutaassaaq nunallu assigiinngitsut akornannut paasisimasaqarluassalluni.