Qinnuigissavatsigit eqqumaffigeqqullugu maani allattorsimasut tamakkiisuunngimmata, ingerlaavartumilli ilanngussivigisarlugillu pitsanngorsaavigisarumaarpavut. Taamaattumik ilanngussassanik siunnersuutissaqaruit ilisimatiinnaritigut.
Ilisimatusarfik issittumi universitetiuvoq nunarsuup ilaani allanngulertorfiusumi ilisimasaqalersitsiviullunilu nutaaliorfiusoq. Ilisimatusarfik suliffeqarfinni namminersortuni pisortaqarfinniittunilu sulilernissamut ilinniagaqartitsiviuvoq humanioramik, inuiaqatigiinnik peqqissutsimillu ilisimatusarfiulluni ilinniagaqartitsiviulluni. Ilisimatusarfik avatangiisinik, nunatsinniittunik nunanilu tamalaaniittunik, suleqateqarnermik pingaartitsingaarpoq.
Pinngortitaleriffimmit isumalluutit uumassusillit, uumasut naasullu, Kalaallit Nunaanni eqqaanilu avatangiisit ilisimatuutut misissuivigineqartarput, aamma Namminersorlutik Oqartussanik, kommuninik oqartussaasoqarfinnillu allanik siunnersuisoqartarpoq. Pinngortitaleriffik suliaqarfinni ukunani immikkoortortaqarpoq:
GCRC tassaavoq nunat tamalaat ilisimatuutut misissuiviat, tassanilu sulisut silap pissusiata allanngoriartornerata issittumi uumassusillit ataqatigiiaarnerannut inuiaqatigiinnullu sunniutai pillugit paasisimasaqarluartuupput. Taamaalilluni pinngortitamik inuiaqatigiinnillu ilisimatusarnermi piginnaasaqarluarfiuvoq.
DTU-p Sisimiuni campuseqarfianiipput Issittumi Sanaartornermut Attaveqarnermullu aamma Aalisarnermut diplomingeniørinngorniarfik kiisalu Cold Climate Engineeringimi aamma Arktisk Semesterimi Nordic Master. Tamatuma saniatigut Sisimiuniit allarpaalunnut tunngatillugu ilisimatuutut misissuisoqartarpoq ornigullunilu sulisoqartarluni.
ASIAQ Greenland Survey Kalaallit Nunaanni avatangiisini paasissutissat tigussaasunit uumassuseqanngitsuneersut tunngavigalugit misissueqqaarfiuvoq ilisimatusarfiullunilu. ASIAQ-p paasissutissaatai aallaaveqarput illoqarfinnik nunaqarfinnillu asimillu sumiiffilersuinernit, imissaqarfinnit naatsorsukkanit, silap pissusianik nakkutilliinernit, nunap qaavata issortaanik naaffiusinnaasumik misissuinernit sanaartornernilu nunamik uuttortaanernit.
De Nationale Geologiske Undersøgelser For Danmark og Grønland (GEUS) Klima-, Energi- og Forsyningsministeriap ataani nunani tamalaani ilisimatusarluni misissuisoqarfiullunilu siunnersuisoqarfiuvoq namminersortoq. Nuummi allaffik oqartussaasunik, innuttaasunik suliffeqarfinnillu siunnersuisarpoq aatsitassanullu silallu pissusianut tunngasunik paasissutissiisarluni.
Nunatta Atuagaateqarfia, Nuummiittunut tamanut nunarpullu tamakkerlugu qitiusumik atuagaateqarfiuvoq. Atuagaateqarfimmi atuakkanik, atuagassianik, naalaagassanik, dvd-inik spilinillu atorsinnaavutit. Atuartarfimmi atuagassianik aviisinilluunniit nutaanerpaanik atuarsinnaavutit.
Groenlandica Atuagaateqarfittut nunatta eriagisaat kulturikkut kingornussassat katersussallugit, nalunaarsussallugit kiisalu atuakkat (aviisit, atuagassiat allallu naqiternikut aamma Kalaallit Nunaanni saqqummersinneqarsimasut suulluunniit tamaasa qanoq ittuuneri apeqqutaatinnagit pissarsiariniassallugit qulakkeertussaavaat. Ilaatigut Kalaallit Nunaata kulturikkut kingornussaanik isumannaareqataasarpoq atuakkanik, aviisinik, atuagassianik saqqummersinneqarsimasunillu allanik kalaallisuunik tamanik katersuinikkut, nalunaarsuinikkut allanngutsaaliuinikkullu. Groenlandicami katersat Ilimmarfimmiipput, ilaat toqqorsivimmi isumannaakkami, ilaat atuagaateqarfimmi tamanut ammasumi.
Katersugaasivik itsarnisarsiornermut, ullutsinni oqaluttuarisaanermut, eqqumiitsuliornermut sanalukkanullu tunngatillugu nuna tamakkerlugu suliassaqartarpoq. Katersugaasivimmiipput illunik itsarnitsanillu allanngutsaaliukkanik nalunaarsukkat pingaarnerit, aamma katersugaasivimmi itsarnitsanik illunillu allanngutsaaliuinermi inatsisinik aalajangersaasoqartarpoq. Katersugaasivik itsarnitsanik nunallu iluani sinnikunik assaanermut akuersissuteqartarpoq. Assaanermi nassaat tamarmik Kalaallit Nunaata pigisarpai. Nunatta Katersugaasivia assaanermi nassaat sumiitinneqarnissaannik inassuteqartarpoq.
Kalaallit Nunaabbu naatsorsoqqissaakkanik suliaqarfiunerpaaq. Naatsorsueqqissaartarfiup pingaarnertut siunertaraa politikkikkut allaffissornikkullu aalajangiinermi misissueqqissaarnernilu atugassanik tutsuiginartunik paasissutissaqarluarnissaanik qulakkeerinissaq. Aamma paasissutissanik katersuivik isumaginninnermi ilisimatusarluni misissuinermi atugassatut naatsorsuussaavoq. Paasissutissat naatsorsoqqissaakkaneersut pingaartumik paasissutissanit allaffissornikkut nalunaarsukkaneersuupput.