Paasisanik nutaanik pilersitsinissamut allaanerusumik periusissiornissaq aatsaat taama pisariaqartinneqartigaaq. Tamatumani eqqumiitsuliornermi kulturimilu periutsit iluaqutaasinnaapput, taamatut oqaluttuarpoq arnaq Kujataani ilisimatusarfimmik pilersitsinissamut isumassarsisoq. Taassuma Arctic Hub »suliniutitut pingaarutilerujussuartut« oqaatigaa.
Allaatiginnittoq Niels Ole Qvist. Assiliisoq: Lise Autogena aamma Leif Josefsen.
Una allaatigisaq, siullermik aviisi paasissutissiissut “Ilisimatusarneq tamanut” Arctic Hub-imit, Sermitsiaq.AG suleqatigalugu, pilersinneqartumi saqqummersinneqarpoq.
Narsaq International Forskningsstation Narsap illoqarfiata qeqqani inissisimavoq kangerlummut, Narsap Iluanut Kuannersuarnullu isikkivigissorujussuarmi.
Illu ilisimatusarfik anginngitsoq marlunnik quleriilik, annertunerusumik anguniagalimmillu ilisimatusarnermi, nunarsuarmut tamarmut atassutilimmi, qitiusumik aallaaviusoq.
Ilisimatuut nunanit tamalaaneersut ilisimatusarfiat, nunap immikkoortuani kujataani kulturikkut ilisimatusarnikkullu suliniutit ineriartortinnerannik samminnittoq.
Suliniut ineriartortinneqarlunilu aqunneqarpoq Lise Autogenamit, taannalu nassuiaavoq tamanna isumassarsiarisimallugu ukiuni Kuannersuarni suliniutip aallartisarneqarnerani, taamanikkut illoqarfimmiut tusaajumaneqanngitsutut akulerutsinneqanngitsutullu misigisimasimallutik. Ukiuni taakkunani Narsaq nunanit tamalaanit sammineqarpoq, ilisimatuunillu orninneqartarluni.
– Ilisimatusarfik aallaavissatut pilersinneqarsimavoq, ilisimatuunik inuiaqatigiinnut pitsaanerusumik akulerutsitsiffiusinnaasoq, qulakkeerlugulu ilisimatusarnermi suliniutit najukkamit ungasissorujussuarmi kisimi saqqummiunneqartassanngitsut, aammattaarli sumiiffimmi siammarterneqartassanut, nunaqavissunut iluaqutaasumik, Lise Autogena nassuiaavoq, taannalu professoriuvoq,Tuluillu Nunaanni Sheffield Hallam Universitetimi Eqqumiitsulianik, Ilusilersuinermik Tusagassiornermillu Ilisimatusarfimmi pisortaalluni.
Kulturip sunniutai
Ilisimatusarfik ilaatigut ilisimatusarnerup eqqumiitsuliornerullu akornanni ataqatigiissoqarneranik pissanganartumik ilisimatusarfiuvoq. Atuartartut ilaat immaqa isumaqassapput taakkua marluk imminnut akerleriittuusut. Nutaamilli suleqatigiinnikkut paasisassanik nutaanik pilersitsisoqarsinnaavoq.
– Eqqumiitsuliornermik ilisimatusarneq, eqqumiitsuliat ilisimasanik nutaanik qanoq pilersitsisinnaanerannik misissuinermik ilisimatusarneruvoq, sulisaatsinik tunngavilik. Eqqumiitsuliornikkut kulturikkullu periutsit isiginneriaatsillu atorlugit paasisanik nutaanik pilersitsinissamut allaanerusumik periusissiornissaq aatsaat taama pisariaqartinneqartigaaq, Lise Autogena nassuiaavoq.
Eqqumiitsuliornermik ilisimatusarnermi Autogena qaqutigoortumik misilittagartuujuvoq, Europami eqqumiitsuliornermik ilisimatusarfiit pisoqaanersaanni, Cross-Disciplinary Art-imi, 2012-imiilli ulluinnarni pisortaanini pissutigalugu. Taanna erseqqissaavoq kalaallit eqqumiitsuliortut sunniuteqarluartut, inuiaqatigiinnut pingaarutilimmik iluaqutaasumik.
– Tassaasinnaapput misigissutsinik ajornartorsiutinilluunniit »titartakkat«, takutinniaruminaassinnaasut. Kalaallit Nunaanni oqaatsinik oqallinneq avissaartuutsitsisinnaammat, eqqumiitsuliat kulturilu peqatigiinnermik pilersitsinissamut pingaaruteqartorujussuupput, aammattaarli suut oqaloqatigiissutigiuminaatsut qaqinneqarnissaannut. Taamaalilluni eqqumiitsuliorneq ilisimasanik nutaanik aamma pilersitsisarpoq, ilisimatusarnermilu periutsinik nutaanik ineriartortitsinissamut paasinninnissamullu pingaarutilimmik ilapittuutaalluni.
– Ilisimatusarfiup Kujataani eqqumiitsuliornerup kulturillu ineriartortinneqarnerunissaa aningaasatigut akilersinnaanersoq periarfissarsiorpaa, Lise Autogena oqarpoq.
