Ilisimatusarfigineqarsinnaasut amerlaqaat, taakkualu ilagaat uagut kulturerput. Unnummi kulturisiorfimmi Arctic Hub meeqqanik inersimasunillu taartumut qaaqqusivoq. Tamaani uulikulaarlunilu ilinniagaqartoqarsinnaavoq.
Nuuk taarsiartortillugu uumasut eqqumiitsut Arctic Hubimi iteriartulissapput.
Januaarip 18-ianni unnummi kulturisiorfimmi meeqqat inersimasullu oqaluttuatoqqat anersaallu pillugit paasisaqarnerusinnaapput. Ilaatigut isiginnaartitsisartoq Ane Marie Ottosen qulliup qaamarngani oqaluttuarnera tusarnaarneqarsinnaassaaq.
Inimi allami eqqumiitsuliortoq Maria Kreutzmann, ‘Bestiarium Groenlandica – kalaallit oqaluttuatoqaanni toornat, uumasut inuunngitsullu pillugit atuagaq najoqqutassiaq assiliartalik’-mik saqqummersitsisoq naapissinnaavat. Taqqamani kalaallit kulturianni toornat ilaat oqaluttuarissavai. Ersivallaanngikkuit taakkua ilaat taartumi naapissinnaavatit.
“Arctic Hubimi ilisimatusarnerup tamanut ammasuunissaa sulissutigisarparput. Unnummi kulturisiorfimmi takutikkusupparput uissuumminartut assigiinngitsorpassuit ilisimatusarfigineqarsinnaasut. Ilisimatusarfigineqarsinnaasullu ilagaat kulturerput. Uagutsinnut kulturisioriartoraanni kulturerput qanorpiaq ilisimatusarfigineqarsinnaanersoq paasineqarsinnaavoq,” Daniel Lyberth Hauptmann, Arctic Hubip allattoqarfiani pisortaagallartoq, oqarpoq.