Arctic Hub pisortartaalerpoq
Arctic Hubip Avijâja Rosing-Olsen allattoqarfimmi pisortatut atorfinitsippaa. Taanna Pinngortitamut Avatangiisinullu Naalakkersuisoqarfimmi chefkonsulentiusimavoq nunalu tamakkerlugu silap pissusia pillugu siullerpaamik periusissiornermut akisussaasuusimalluni.
“Tutsuigineqarnera tulluusimaarutigaara, suliassallu siunertaqarluartup tamatuma suliarilernissaanut qilanaarpunga. Ilisimatusarneq ilisimatusarfigisanillu ingerlatitseqqiineq inuiaqatigiinnik ineriartortitsinermut annertuumik sunniuteqarsinnaalluarput – aalajangiiniarnermi toqqammavissatut atorutsigit, assigiinngitsunik pullaveqarluta ajornartorsiutinik erseqqissaanermi sakkugigutsigit aammalu innuttaasut, aalajangiisartut ilisimatusartullu ataqatigiilluarnerulersinnerisigut,” Avijâja Rosing-Olsen oqarpoq.
Taanna Arctic Hubip allattoqarfiani Nuummiittumi pisortatut allaffimmi sulisunik siulersuinermut akisussaasuussaaq Arctic Hubimilu siulersuisunut akunnermiliuttuussalluni.
Ilisimatusarnermik inuiaqatigiinnillu ataqatigiilersitsineq
Arctic Hub Kalaallit Nunaata Danmarkillu suleqatigiinneratigut 2020-mi pilersinneqarpoq. Pilersitsinermut siunertarineqarpoq ilisimatusarnerup inuiaqatigiillu ataqatigiilersinnissaat, taamaattumillu Arctic Hub ilisimatusartunut katersuuffiuvoq paasisanillu nutaanik innuttaasunut saqqummiussiviulluni – ilaatigut ilisimatusarfigisanik saqqummiussillaqqinneqqusaanneq Paasisavut aqqutigalugu.
Taamaattumik Avijâja Rosing-Olsen Arctic Hubimi pisortatut Kalaallit Nunaanni pingaarnerit ilaattut ilisimatusarnermik ineriartortitseqataassaaq ilisimatusarnermullu sunniuteqaqataassalluni. Tamatuminnga suliaqarnissani qilanaareqaa.
“Kalaallit Nunaanni ilisimatusarnerup innuttaasunut inuiaqatigiinnullu iluaqutaanissaanut taperseeqataanissara suliassama pingaarnersaattut isigaara. Kalaallit Nunaanni ilisimatusarnerit ilarpassui pitsaanerulersinneqarsinnaapput innuttaasunik pilersitseqateqartarnikkut, kulturinik naleqartitanillu eqqumaffiginninnikkut aammalu naapeqatigiittarnikkut isummersoqatigiittarnikkullu. Matumani Arctic Hub ataqatigiilersitsisutut pingaarutilimmik inissisimaffeqarpoq, minnerunngitsumik meeqqat inuusuttullu ilisimatusarnermut tunngasunik alapernaallisarniarnerani soqutiginnilersinniarnerannilu.”
Isumalluarneq
Arctic Hubimi siulersuisuni siulittaasup, Mininnguaq Kleistip, suleqatigiinnissartik qilanaaraa allattoqarfimmilu pisortartaaq isumalluarfigalugu:
“Siulersuisuniittugut isumaqatigiilluta Avijâja Rosing-Olsen Arctic Hubimi siuttuusussatut toqqarparput. Avijâja inuiaqatigiinnik ineriartortitsinissamik suliaqarusulluinnartuuvoq, nuannaarutigaarpullu ilisimatusarnermik suliaqarfimmik ineriartortitseqataarusummat. Periusissiukkamik aqutsineq misilittagaqarfigaa, Kalaallit Nunaanni Danmarkimilu politikkikkut aaqqissuussat ilisimasaqarfigilluarpai, silallu pissusianut tunngasutigut suliaqarnermigut ilisimatusarnermik suliaqarfik ilisimasaqarfigalugu, tamannarpiarlu Arctic Hubip allattoqarfiani pisortatut atorfittaamini iluaqutigissavaa.
Avijâja Rosing-Olsen pisortanngussaaq oktobarip 1-ianni, 2025.
Apersuerusuppit, assinik perusuppit nalunaarulluunniit una pillugu apeqqutissaqarpit? Taamaappat allattoqarfimmi pisortaagallartoq Jula Maegaard-Hoffmann attavigigiuk uunga allallutit: jula@arctichub.gl.