Arctic Hub-imi suliniutinut aqutsisussarsiorpugut

June 26, 2026 | Written by Arctic Hub

Arctic Hub-imi suliniutinut aqutsisumik tunniusimasumik pissarsiorpugut, ilisimatusarnerup inuiaqatigiinni pingaaruteqassusianik nukittorsaaqataarusuttumik kiisalu Kalaallit Nunaanni ilisimatusartut, oqartussat, ilinniarfiit, inuussutissarsiortut innuttaasullu akornanni suleqatigiinnerup ineriartortinnissaanut peqataarusuttumik.

Atorfik pillugu

Arctic Hub-imi suliniutinut aqutsisutut Issittumi ilisimatusarneq inuiaqatigiinnillu ineriartortitsineq pillugit pingaarutilinnik suliaqassaatit. Najukkami, Kalaallit Nunaanni nunallu tamalaat akornanni suleqatigisat peqatigalugit suleqatigiinnerup ineriartortinnissaanut nukittorsarnissaanullu peqataassaatit. Arctic Hub-imi inuit assigiinngitsorpassuit suleqatigisarpavut – ilisimatusartunit ataasiakkaanit innuttaasunillu tunniusimasunit nunani tamalaani ilisimatusarfiit tikillugit.
Suliassatit ilaatigut makkuussapput:

Ilisimatusartut, ilinniarfiit, pisortat ingerlatsiviisa, inuussutissarsiortut innuttaasullu akornanni suleqatigiinnerup nukittorsarnissaanut suliniutinik aaqqissuussanillu ineriartortitsineq, aallartisaaneq naammassinninnerlu.
Suliniutinik isumassarsiamit atuutilersitsinermut nalunaarusiornermullu namminersorluni aqutsineq, ilanngullugit Arctic Hub-ip EU-mi Green Growth-programmimi suliniutaanik aqutsineq
Allaffissornikkut suliassanik ataqatigiissaarineq kiisalu allattoqarfiup pisortaanut siulersuisunullu paasissutissanik atortussanillu piareersaasarneq.
Arctic Hub sinnerlugu Kalaallit Nunaanni nunanilu allani ataatsimeersuarnerni, suleqatigiiffinni ataatsimiinnernilu attuumassuteqartuni peqataaneq.
Aningaasaliissutinik pissarsiniarnermut kiisalu aningaasaliinissamut periarfissanik nutaanik ineriartortitsinermut peqataaneq.

Arctic Hub-imi suliniutit assigiinngitsut aqunneqarnerannut ataqatigiissaarneqarnerannullu akisussaaffeqassaatit, matumani ilanngullugit suliniutit nunami namminermi nunanilu tamalaani aningaasaateqarfinnit programminillu aningaasalersorneqartut. Ilaatigut Paasisavut, ilisimatusarnermik saqqummiussinermut unammisitsineq, Greenland Science Week kiisalu Arctic Hub-imi suliniutit pingaarnerit allat ineriartortinneqarnerannut ingerlanneqarnerannullu peqataassaatit. Suliassat akisussaaffiillu piginnaasatit misilittakkatillu naapertorlugit naleqqussarneqarsinnaapput.

Isumaqatigiissuteqarnikkut Kalaallit Nunaanni nunanilu allani angalasarnissat naatsorsuutigineqassaaq.

Allattoqarfiup pisortaa qaninnertut pisortarissavat, suleqatigiinnilu ikittuni tunniusimasunilu peqataalissallutit.

Piginnaasatit

Ataani allassimasut tamaasa piginnaasaqarfiginissaat pisariaqanngilaq. Taamaattorli amerlanerit naapertorlugit piginnaasaqarnissat naatsorsuutigaarput:

naleqquttumik ilinniagaqarsimasuuvutit – taamaattorli alapernaassuseqarluaruit misilittagaqarluaruillu aamma pitsaasumik tunngavissaqarsinnaavutit
ulluinnarni suliassanik assigiinngiiaartunik suliaqarnissat nuannarivat – allaffimmi sulinermit Kalaallit Nunaanni, Danmarkimi nunanilu allani Arctic Hub sinnerlugu peqataasarnermut
suliniutinik ingerlatsinermik imaluunniit aqutsinermik misilittagaqarputit
kalaallisut, danskisut tuluttullu pitsaasumik attaveqallaqqissuuvutit
Issittumi ilisimatusarneq kiisalu Kalaallit Nunaanni inuiaqatigiinni politikkikkullu pissutsit pillugit ilisimasaqarputit, imaluunniit tamakkununnga tunngatillugu annertunerusumik ilikkagaqarusupputit

Inuttut piginnaasatit

Ujarpatsigit illit:

tunniusimasuusutit namminerlu suliniuteqartartuullutit
aaqqissuussamik suleriaaseqartutit, suliallu ingerlaneri pillugit eqeersimaartuullutit kiisalu suliassanik assigiinngitsunik suliaqarnissat nuannaralugu
isumassarsiullaqqissuusutit, alapernaatsuullutit nutaanillu ilikkagaqarnissamik kajumissuseqartutit
suleqatigiinnermi peqataalluarsinnaasutit akisussaaffimmillu tigusisinnaasutit – namminersortumillu sulinermi
pitsaasunik attaveqaateqarnermik pilersitsisinnaasutit attassiinnarsinnaasutillu
teknikkimik digitalinillu atortut pillugit paasisimasaqartutit (Office-programmit saniatigut ilaatigut Asana, Canva, Podio aamma WordPress atortarpagut)

Arctic Hub pillugu

Arctic Hub Issittumi ilisimatusarnermut, immikkut Kalaallit Nunaanni pissutsinut tunngasunut katersuuffiuvoq. Nuummi allattoqarfia Kalaallit Nunaata Danmarkillu suleqatigiinnerisigut pilersinneqarpoq, Arctic Hub-illu anguniagai amerlapput annertullutillu. Allattoqarfimmi ilisimatusarnerup inuiaqatigiillu akornanni ataqatigiinnerup nukittorsarnissaa sulissutigaarput, oqaloqatigiinneq, suleqatigiinneq ilisimasanillu avitseqatigiinneq aqqutigalugit inuiaqatigiinnut iluaqutaasumik. Arctic Hub pillugu annertunerusumik paasissutissat nittartakkatsinni www.arctichub.gl -imi atuarneqarsinnaapput.

Allaffeqarfik Pikialaarfimmi Pinngortitaleriffiup eqqaani kusanarluinnartumi inissisimavoq. Suliffimmi avatangiisit pitsaasut neqeroorutigisinnaavagut (kaffilu pitsassuaq), kiisalu illoqarfimmi ulloqeqqasiortarfiit pitsaanersaasa ilaanni ataatsimoorluta nereqatigiittarpugut. Suleqatissatit suliffimmik pissanganartumik, assigiinngiiaartunik inuiaqatigiinnullu pingaaruteqartumik nuannarisaqartuupput, tassanilu akisussaaffinnik tigusinissamut suliamullu tunngatillugu ineriartornissamut pitsaasunik periarfissaqarpoq.

Akissarsiat atorfinitsitaanermilu atugassarititaasut

Akissarsiat atorfinitsitaanermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut kiisalu pisattat nassiunneqarnerannut pisinnaatitaaffiit, atorfininnerup nalaani Kalaallit Nunaanni Namminersorlutik Oqartussat kattuffiullu isumaqatigiinniarsinnaatitaasup akornanni isumaqatigiissut atuuttoq naapertorlugu aalajangersarneqassapput.
Qinnuteqartut uppernarsarneqarsinnaasunik immikkut ittunik suliamut tunngatillugu piginnaasaqarpata, isumaqatigiissuteqarnikkut immikkut siunnersortitut imaluunniit siunnersortit pisortaattut atorfinitsinneqarsinnaapput.

Ineqarneq

Atorfimmut atatillugu sulisunut inissiamik innersuussisoqassanngilaq. Qinnuteqartoq Namminersorlutik Oqartussani atorfeqarnermigut sulisunut inissiamik innersuussiffigineqareersimappat, sulisunut inissiamik innersuussiffigineqarnissamut pisinnaatitaaffini attatiinnassavaa. Sulisunut inissiaq atorfeqarnermut attuumassuteqarpoq, taamaattumillu atorfeqarnerup unitsinneqarnerani qimanneqassalluni.

Qinnuteqaat, CV, ilinniarsimanermut pikkorissarsimanermullu uppernarsaatit kiisalu paasissutissat allat attuumassuteqartut “Qinnuteqaat nassiuguk” toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqarnissamut paasissutissat

Qinnuteqarnissamut killissarititaasoq: 1. august 2026

Suliffiup suussusaa: Tamakkiisumik suliffik

Atorfinitsitaanermi atugassarititaasut: Isumaqatigiissut naapertorlugu

Atorfiniffissaq: Piaartumik, isumaqatigiissuteqarnikkut

Sapaatip akunnerani 33-mi oqaloqatiginninnerit ingerlanneqarnissaat naatsorsuutigaarput.

Piginnaaneqartut tamaasa kajumissaarpavut qinnuteqaqqullugit, ukioqqortussuseq, suiaassuseq, innuttaassuseq imaluunniit tunuliaqutaq apeqqutaatinnagit. Atorfik pillugu paasisaqarnerorusukkuit imaluunniit apeqqutissaqaruit, pisussaaffiliinngitsumik oqaloqateqarnissamut tikilluaqqusaavutit. Allattoqarfimmi pisortaq Avijâja Rosing-Olsen attavigineqarsinnaavoq e-mailikkut: avijaja@arctichub.gl imaluunniit oqarasuaatikkut: +299 361284.

Qinnuteqaat nassiuguk

Ataani Arctic Hub-imi ulluinnaat ilaatigut qanoq ittarnersut takusinnaavat:

2025-mi siullermeerluta Greenland Science Week qitiusumik aaqqissuisuuffigaarput

Arctic Hub Connectimik – ilisimatusartut suliaminnik ataqatigiissaarisarfiannik – aaqqissuussisarpugut

Nunatsinni nunanilu allani ataatsimeersuarnerni peqataallutalu saqqummiussaqartarpugut

Kalaallit Nunaanni ilisimatusaatigalugu suliniutigineqartut pillugit ilisimasanik saqqummiussisarpugut.

2025-mi siullermeerluta ilisimatusarneq pillugu festivaali Qaagitsi ingerlapparput.

2024-imi appassaanik Paasisavut ingerlappparput.

Arctic Hub Atorfik inuttassarsiussaq Suliffissat ingerlariaqqiffissallu