Arctic Hub Connect

Arctic Hub Connect ukiumoortumik internetikkut aaqqissuunneqartarpoq ilisimatusartut ilisimatusarnermillu soqutigisaqaqatit Kalaallit Nunaanni ilisimatusarnermik suliallit suleqatigiinnerusarnissaat siunertaralugu.

Aaqqissuussami tamatumani ilisimatusartut nunatsinneersut nunanillu tamalaaneersut tamaasa piffissami takkuttumi suliniutissaminnik ornigullutillu misissugassaminnik oqaluttuarinneqqullugit kajumissaartarpavut, taamaalillutik Kalaallit Nunaanni eqqaanilu ukiup ingerlanerani ilisimatusarnissat malinnaavigineqarluarnerusinnaaniassammata.

Arctic Hub Connectimi ilaatigut siunertarineqarpoq suliniutinik Kalaallit Nunaanni ingerlanneqartunik pitsanngorsaallunilu sunniuteqarluarnerulersitsinissaq aammalu research fatigue-imik annikillisaanissaq – taakkulu anguneqarsinnaapput ataqatigiissaarilluarnerunikkut ilisimasanillu avitseqatigiinnikkut. Taamaattumik Arctic Hub Connect soorunami aamma inunnut tamanut ammavoq – ilisimatusarfigisat, suliffigisaq inuiaassuserlu apeqqutaanatik.

Workshoppertitsinerup kingorna Arctic Hub peqataasut paasissutissiissutaannik internetikkut nunap assinganut katersuisarpoq, taannalu nammineq saqqummiussivigisartakkatsigut tamanut saqqummiuttarparput Kalaallillu Nunaanni tusagassiorfinnut nassiuttarlugu. Taamaalillutik paasissutissat Arctic Hub Connectimi oqaluttuarineqartut Kalaallit Nunaanniittunit tamanit iluaqutigineqarsinnaanngortarput.

Saaffigineqartut: Kalaallit Nunaanni ilisimatusartunut tamanut ammavoq. Kalaallit Nunaanni ilisimatusarnermik soqutigisaqaqatittaaq peqataasinnaapput.

Ulloq: Ukiut tamaasa ukiup nutaap aallartilaarnerani.

Peqataaneq: Workshoppi internetikkut tuluttut ingerlanneqartarpoq. Nalunaartoqarsinnaanngorpat peqataanissat nalunaarutigiinnassavat.

Siunertaq:

1) Kalaallit Nunaanni ilisimatusarfigineqartunik tamanik malinnaavigiuminarsaanissaq.

2) Soqutigisaqaqatit, ass. innuttaasut, pisortatigoortumik ingerlatsiviit inuussutissarsiornermillu ingerlatsiviit malinnaaqataatinnissaat.

3) Ilisimatusarnermik pitsanngorsaanissaq ataqatigiissaarinikkut, suleqatigiinnikkut ilisimasanillu avitseqatigiinnikkut.

4) Kalaallit Nunaanni research fatigue-imik annikillisaanissaq.

Arctic Hub Connectitut workshoppertitsisoqartarnissaa sooq pisariaqartipparput?

Kalaallit Nunaanni ilisimatusartut ornigullutik misissuinerisa suliniutaasaluunniit nalunaarsorneqartarnissaat pillugu piumasaqaateqanngimmat ilisimatusarfigineqartut malinnaavigineqarsinnaanngillat. Naalakkersuisulli ilisimatusarnermut periusissiaanni Kalaallit Nunaanni ilisimatusarnerit tamarmik Kalaallit Nunaannut iluaqutaanissaat qitiutinneqarpoq.

Tamanna angujumallugu nunatsinni suut ilisimatusarfigineqarnersut ilisimaneqartariaqarpoq, matumanilu ilisimatusartut suleqataarusussuseqarnissaat pingaaruteqarluinnarpoq.

Kalaallit Nunaanni ilisimatusarfigineqartunik malinnaavigiuminarsaaqataanissarput Arctic Hubimi kissaatigaarput. Taamaattumik Arctic Hub Connect aqqutigalugu kajumissaarpatsigit Kalaallit Nunaanni ilisimatusarnissamik pilersaarutitit uagutsinnut, suleqatinnut inuiaqatigiinnullu kalaallinut oqaluttuareqqullugit. Tamatuma saniatigut sumiiffinni tikeraassamaakkanni suliniutigineqartut allat paasisaqarfigissavatit – aamma immaqa suleqatissannik naapitseriaannaassaatit.