Arctic Hubip allattoqarfia Nuummiittoq allamik pisortassarsiorpoq Jula Maegaard-Hoffmannip aalajangiummagu suliassani allamut ingerlateqqinniarlugu.
Kalaallit Nunaanni ilisimatusarnermik sammivileeqataanissat takorloortarukku maanna immikkut ittumik periarfissaqarputit. Jula Maegaard-Hoffmann Arctic Hubimi – Kalaallit Nunaanni ilisimatusarnikkut katersuuffiusumi – siuttooreerluni aalajangerpoq akisussaaffik ingerlateqqinniarlugu. Taamaattumik allattoqarfimmi pisortatut atorfik maanna inuttassarsiuunneqarpoq.
Allattoqarfimmi sisamanik aalajangersimasunik atorfeqartoqarpoq suliniutinullu atatillugu atorfeqartorpaaloqarluni, allattoqarfillu Nuummi Pikialaarfimmiippoq.
“Suleqatigiit attaveqarfigisartakkallu tunniusimasut Kalaallit Nunaanni ilisimatusarnerup silarsuaata siunissaa pillugu sulisut suleqatiginerat uannut isumaqarluarsimaqaaq. Aammattaaq inuit piumassuseqarlualersitsisartut Kalaallit Nunaanni naleqangaartunik ilisimasallit taama amerlatigisut naapisimaartarlugit nuanneqaaq,”
– Jula Maegaard-Hoffmann.
Takorluukkanik piviusunngortitsineq
Jula Maegaard-Hoffmann 2021-mi tunngaviliisoqarneraniilli Arctic Hubimiissimavoq – siullermik konsulentitut 2023-milu aggustimiit allattoqarfimmi pisortatut. Taamaalilluni Jula Arctic Hubip pappiaqqami takorluugaannartut allassimaneraniilli ullumikkumut suliniuteqarfiulluartutut inissisimalernissaa tikillugu peqataasimavoq.
“Peqatigiilluta ingerlatsivimmik maanna Kalaallit Nunaanni inuiaqatigiinni nunanilu tamalaani ilisimatusarnerup silarsuaani inissisimallualersimasumik pilersitsivugut. Taamaattumik aqutsisutut atorfiup allamut ingerlateqqinnissaanut maanna piffissanngorpoq,” Jula Maegaard-Hoffmann oqarpoq.